ჩვენს შესახებ
ბაჩების ამბავი ჩემი პირველი შვილის, ალექსანდრეს ბაჩებით დაიწყო.
პირველად დედობა ბევრ კითხვას აჩენს. როცა გამოცდილება ჯერ არ გვაქვს, ხშირად ახლობლებს, ნათესავებსა და ექიმებს ვეყრდნობით. ჩემს შემთხვევაშიც ასე იყო: ალექსანდრეს უხეში, ორთოპედიული ბაჩები ეცვა, შიგნით სუპინატორით — რადგან „ექიმმა ასე გვირჩია“. მაშინ ფეხსაცმლის შერჩევაზე ბევრი არაფერი ვიცოდი და ამ რჩევას ვენდობოდი.
ალექსანდრე დაახლოებით ცხრა-ათი თვის იყო, როცა ჩვენი სახლის ეზოში ია და მისი პატარა მარიამი გავიცანი. სამეზობლოში ბევრი ბავშვი იყო, მაგრამ ამ დედა-შვილმა ჩემი ყურადღება მიიქცია. მე და ია მალე დავახლოვდით და დღეს მეგობრები ვართ.
იას გერმანიაში წლები ჰქონდა გატარებული. სწორედ მან გამაცნო გერმანული და ევროპული საბავშვო ბრენდები — რიხტერი, ელეფანტენი, ლურჩი და რიკოსტა. მარიამისთვის რბილ, დრეკად ბაჩებს არჩევდა. ამ პატარა აღმოჩენამ ჩემთვის სრულიად ახალი ინტერესი გააჩინა: მინდოდა გამეგო, რას ვარჩევთ ბავშვისთვის ფეხსაცმლის ყიდვისას და როგორ მოძრაობს ფეხი მასში.
ამ თემამ იმდენად გამიტაცა, რომ ფეხის ანატომიისა და მოძრაობის ბიომექანიკის შესწავლა დავიწყე. 2021 წლის ივნისში ინსტაგრამზე ბაჩების ბლოგი შევქმენი. თავიდან ფეხის ზომის სწორად აღებაზე ვწერდი, შემდეგ ბრენდებს ვაცნობდი მშობლებს და ფეხშიშველ მოძრაობაზეც ვსაუბრობდი.
სწავლის სურვილი ბლოგის დაწყების შემდეგაც გაგრძელდა. გავიარე ტრენინგები barefoot-ის თემის უცხოელ წევრებთან, მათ შორის პეტრა ფიშერის Take10 კურსი, სადაც მთელი სხეულის მობილობასა და თავისუფალი მოძრაობის ვარჯიშებს გავეცანი. ეს ინტერესი ჩემს ყოველდღიურობაშიც გადმოვიდა: კოჭის განმეორებითი ტრავმების შემდეგ საკუთარ მოძრაობას უფრო ყურადღებით დავაკვირდი და მიღებული ცოდნა პირად პრაქტიკაშიც გამოვიყენე.
დღეს ბაჩებში იმ ცოდნასა და გამოცდილებას ვაერთიანებ, რომლის დაგროვებაც საკუთარი შვილისთვის ფეხსაცმლის ძიებით დავიწყე. მინდა მშობლებს ბაჩების შერჩევაში გულითადად დავეხმარო — გავითვალისწინოთ ზომა, ფეხის ფორმა და ბავშვის ინდივიდუალური საჭიროებები.
თავისუფალი ბაჩები თავისუფალ ბავშვებს.